Psa 108 | TUCT | STEP | Mbouŋ to David Maaron, lolog ruru payo mako. Lolog isaghav ghom, ve naghur ilat tsiam ariaaŋ. Tauvene nasaav pa taug naghe: “Uburig ve umbou to upait Maaron!”

aMbo 36:5

Psalms 108

Ŋeer ee ipait Maaron ve ighasoni pa uleeŋ

Mbouŋ to David

1 Maaron, lolog ruru payo mako.
Lolog isaghav ghom, ve naghur ilat tsiam ariaaŋ.
Tauvene nasaav pa taug naghe: “Uburig ve umbou to upait Maaron!”

2 Lolog ighur naghe nughitun, o naburig, ve nagharaat taug,
ve naravrav ambam tomania gita ila ila le aaz pisikia izaa.

3 Tiina tsiau, yau aat napait ghom pa poia tsio ila tamtamon to nugh nugh matazi.
Pale yeŋa tamtamon to nughmariŋ nilup ghei pa suŋuuŋ, ve nait mbouŋ to napait ghom.

4 O Yoova, yo lolom isaghav tamtamon tsio, ve uluul zi.
Ŋgar tsio tana, ene tiina le tiina kat. Izala izala le ikis sambam.
Ve ŋgar to taghoniiŋ saveeŋ mbuaaŋ tsio tauvene paam. Izala le ikis taitai. ^a
5 Maaron, eval tiina aat tipait ezam izala le izala kat, iliv sambam saamba.
Ve tipakur ghom pa tapirim ve poia tsio irau taan isov!

6 Maaron, yei tamtamon tsio. Lolom igheen tsiei kat.
Ulooŋ suŋuuŋ tsiau tane, ve utotoi tapirim ve uul ghei.
Ugham mulin ghei pa pataŋani tane.
7 Muuŋ, Maaron ileep izi nugh tooni patabuyaaŋ, ve isaav ighe:
“Yau naparav le naliiv koiagŋa wa.
Tauta lolog poia ve navalagh taan Sekem ve nugh duduuŋa to Sukot, ve nareii irau tamtamon tsiau.

8 Taan sirivu to Gileat, ve taan to yes Manase paam, ene yau tsiau.
Yes Epraima timin hat ariaaŋa to ipoon dabag pa malmal.
Ve yes Yuda timin titi tau nakisi imin ilaal pa pooz tsiau.

9 Taan sirivu to Moap, ene imin oon tsiau to ririwaaŋ.
Ve taan sirivu to Edoma, ene nugh tau nasik zuzuuŋa to agheg pani.
Ve yes Pilistia, yau naparav tomani zi le naliiv zi. Tauta tintinig ve aliŋag izaa.”
10 Sei irau igham ghau naliiv koiagŋa ve naloŋ nala nugh toozi tau didiiŋ ariaaŋa ilivuti na?
Sei pale imuuŋ payau, ve igherev ghau nala navot taan sirivu to yes Edom?

11 Ite paam mako. Yo mon.
Eemon Maaron, aazne yo ughur murim payei, ve upaak zaaba tsiei muul mako.
12 Maaron, uul ghei, leso niliiv koiamaiŋa.
Pasaa, uleeŋ tau nighamghamu ila to tamtamon, ene anooŋa mako.

13 Eemon isaav ighe Maaron ilam tomani ghei, ene aat niliiv zi.
I irau itatan zi, le tapirizi isov kat.